ئەم مانگە شەش ساڵی تەواو تێپەڕی بەسەر دەرچوونی یەکەم ژمارەی "نێوەند" کە لەرۆژی 4-7-2004 دەرچوو، بەم ژمارەیەش گۆڤارەکە پێدەنێتە ساڵی حەوتەمی کارکردنەوە. ئەوەی کارکردنی ئێمە لە تەواوی گۆڤار و رۆژنامەکانی تری کوردستان جیا دەکاتەوە، رەنگبێ دوو جیاکەرەوەی زۆر گرنگ و دیار بێت. یەکەم: ئەم پڕۆژەیە هەوڵیداوە تا ئەوپەڕی توانا لەرووی کارکردنەوە بێلایەن و سەربەخۆ بێت، چوونکە بەدرێژایی شەش ساڵی رابردوو و لەدووتوێی هەر 76 ژمارەکەی پێشووەوە، ئەوە بە ئاشکرا دەبینرێت، ئەم گۆڤارە رووبەرێکی زۆری کردۆتە لەبەردەم هەموو هێز و مەیل و ئاڕاستە سیاسییەکانی کوردستان کە بەشێوەیەکی یەکسان دەرفەتیان بۆ بڕەخسێنرێت تا قسە و ئەجیندا و دونیابینی خۆیان بگەیەنن، هەروەک چۆن بەهەمان ئەندازەی یەکسان رەخنەیان لێگیراوە، ئەزموونی ئەم شەش ساڵەی کارکردنی ئێمە بە شەفافی ئەوەی تێدا دەبینرێت، ئێمە رەخنەمان لەهەر کەس گرتووە کە شایانی رەخنەلێگرتن بووبێت و بەشان و باڵی هیچ کەسیشماندا هەڵنەداوە جا هەر کەسێک بێت و لەهەر پۆست و پلە و پایەیەکدا بووبێت. بەلای ئێمەشەوە ئەمە یەکێکە لە خەسڵەتە بەهێز و جیاکەرەوەکانی ئەم گۆڤارە لە زۆرینەی زۆری ئەو بڵاوکراوەکانی ئەمڕۆ لە کوردستاندا بوونیان هەیە. جیاکەرەوەی دووەمیش بریتییە لەوەی ستایڵی کارکردنی ئەم گۆڤارە شیکاریی سیاسیی و بەدواداچوونی رووداوە گەرم و هەستیارەکان بووە، بۆیە نە گرنگی بە هەواڵی شەخسی و سکەنداڵی وەهمی و زانیاریی موخابەراتی داوە و نەبووە بەبەشێک لەو شەڕە سارد و پڕ موهاتەرات و ناماقووڵەی بەشێوەی جۆراوجۆر لەنێوان هێزە سیاسییەکانی کوردستاندا بەڕێوە دەچێت. بۆیە ئێمە بەهۆی ئەو دوو جیاکەرەوە زۆر گرنگ و بایەخدارەوە، شانازیی ئەوەمان پێ بڕاوە کە وەک پڕۆژەیەکی جیددی لە گۆڕەپانەکەدا ناومان بێتە ناو ناوانەوە.
ئێمە کە ئێستا لەسەرەتای ساڵی حەوتەمی کارکردنداین و ئەم ژمارەیەش یەکەم ژمارەی ساڵەکەیە، دیسان دووپاتی دەکەینەوە، رێگای پێشووی خۆمان وەک پڕۆژەیەکی جیددی و خاوەن زمان و ئیتیکی رۆژنامەوانی پرۆفیشناڵ، درێژە پێدەدەین و دەمانەوێت هەرچی لایەنە گەشەکانی کارکردنمانە زیاتر برەوی پێبدەین و ئەو هەڵە و کەموکوڕییانەی بەهەر هۆیەکەوە روویدابێت، کەمیان بکەینەوە تا سنووری لەناوبردنیان، بۆیەکا ئێمە وەکوو ستافی گۆڤاری نێوەند لە ساڵی نوێی کارکردندا ئەوە بەخوێنەرانی گۆڤارەکەمان رادەگەیەنین کە بەهەوڵ و ماندوبوونی بێ بەرامبەری هەریەک لە ئەندامی ستاف و پاڵپشتی نووسەران و خەمخۆرانی بواری رۆژنامەوانی کوردیی، لەکارەکەمان بەهەمان شێوە و ستایڵی پێشووەوە بەردەوام دەبین، بگرە هەموو هەوڵەکانمانى لەوەدا چڕتر دەکەینەوە بۆ ئەوەی هەرچی زیاتر وردتر و فراوانتر کارەکانمان درێژە پێبدەین تائەوەی گۆڤارێک پێشکەشی خوێنەرانی کورد بکەین کە تینووێتیان بشکێنێت و زانیارییەک "ئەگەرچی کەمیش بێت" بخاتە سەر خەرمانی زانیارییەکانیان، بەکورتی دەخوازین گۆڤارێک پێشکەش بکەین کە وەک پێشوو شایانی خوێندنەوە و رەزامەندیی خوێنەران و ئەو خەڵکە دڵسۆزانە بێت کە بەهەق پڕۆژەی جیددی و خاوەن باکگراوەندی قووڵ دەناسن و هەستی پێدەکەن.
پێمان خۆشە لەم دەرفەتەشدا باسی ئەوەش بکەین، نێوەند نەک پڕۆژەیەکی لایەنگر و سێبەری ئەم حزب و ئەو لایەنی سیاسیی کوردستان نییە، بەڵکو بەهەموو مانا و بەهەموو پێوەرێک کۆی مەرجەکانی رۆژنامەوانییەکی ئازاد و پیشەوەر و سەربەخۆ، لەم گۆڤارەدا هەیە، تەنانەت ئەگەر هەندێک لە ئەندامانی ستافی گۆڤارەکەشمان بیروباوەڕ و رێبازێکی سیاسیی دیاریکراویان هەبووبێت و بۆ ئاڕاستەیەکی سیاسیی "نەک حزبی" تایبەت بەخۆیان لە دەرەوەی ئەم گۆڤارە کاریان کردبێت، ئەوا بەشاهیدیی خوێنەران هەرگیز ئەو بیروباوەڕانەی خۆیان بەسەر گۆڤارەکەدا نەسەپاندووە و نەیانویستووە ئەم گۆڤارە بکەنە مەودایەک بۆ بانگەشە بۆ بیروباوەڕی تایبەتی خۆیان، بەڵکو بەپێچەوانەوە هەموو وەک رۆژنامەنووسی سەربەخۆ و بێلایەن مامەڵەمان لەگەڵ بابەتە رۆژنامەوانییەکان کردووە و بەبێ هیچ بڕیارێکی پێشوەخت لەبواری کاری رۆژنامەنووسیی خۆماندا بە ئەرکەکانمان هەستاوین، ئەمەش یەکێک بووە لەو هۆکارانەی تائێستاش ئەم گۆڤارە هەمان میسداقییەتی سەرەتای خۆی ماوە و بڕواش ناکەم کە ئەم راستگۆییە لەدەستبدات مادام هێشتا ستافی نێوەند بە کۆی دەنگ بڕیاریان داوە کە وەک پیشەوەر کاربکەن و گۆڤارەکە نەکەنە پانتاییەک بۆ شەڕی ئایدۆلۆژیی و سیاسیی و حزبی و تەنانەت دەستەگەریی و شەخسیش، هەروەک چۆن چەندان دامودەزگا و گۆڤاری خۆ بەسەربەخۆزان و قسە زل و هەرا و هۆریاکاری بەناو سەربەخۆ ئەم کارە دەکەن و کاتێکیش قسە دێتە سەر سەربەخۆبوون و بێلایەنی خۆیان بەپێغەمبەری میدیای ئازاد دەزانن و تەنانەت مافی ئەوەشیان بەخۆیان داوە مۆر لە خەڵکی بدەن کە کێ سەربەخۆیە و کێ سەربەخۆ نییە و کێی تریش سێبەری ئەم و ئەوە؟.

ئێمە لەکۆتایی ئەم نووسینە کورتە و سەرەتای ساڵی نوێی کارکردنماندا جارێکی تر بەڵێن دووبارە دەکەینەوە کە وەک رۆژنامەنووسی ئازاد و خاوەن ئیتیک و مۆراڵی رۆژنامەنووسیی کاربکەین و دەست بگرین بەو کولتوورە زۆر سەرکەوتووەی پێشووەوە کە ئێمەی وەک پڕۆژەیەکی بێلایەن و بەهەق سەربەخۆ هێشتۆتەوە، بڕیارمان داوە کە بەهەمان نەفەس و رۆحیەتی پێشووەوە لەسەر کارەکانمان بەردەوام بین و ئیدی لەوە بەولاوە خەڵکی تر چی دەڵێن و چۆن بیر دەکەنەوە، ئەوە کێشەی ئێمە نییە و ناتوانێت بەخۆیەوە سەرقاڵمان بکات.
ستافی گۆڤاری نێوەند

Comments (0)

Name

Email

Title

Comment

smaller | bigger

Add Comment