ئه‌ی شاعیره‌ یاخی بووه‌كه‌ی تاراوگه‌
ده‌زانم له‌به‌ر ئه‌م زه‌مه‌نه‌
شێواوه‌وه‌ و بێسه‌ر و به‌ره‌
دڵت پڕی ئاخ و ئۆفه‌ و
زامی له‌ مێژینه‌ی تیایه‌
ئه‌گه‌ر ئه‌م جاره‌ هاتیه‌وه‌
چه‌پكه‌ گوڵه‌كه‌ی سه‌ربازی وون‌
له‌بیر نه‌كه‌ی
بیده‌ی به‌و دایكانه‌ی
كه‌ چاوه‌ڕێ كوڕه‌
بێ سۆراغه‌كانیانن
شیعره‌كانت یه‌كه‌ یه‌كه‌
له‌ سه‌ر تابلۆیه‌ك
به‌ گه‌وره‌ی بنووسه‌وه‌
له‌به‌ر ده‌ركی قه‌ڵا
هه‌ڵیان واسه‌
با منداڵه‌كان بیخوێنه‌وه‌
نه‌وه‌كو وه‌كو جاری پێشوو
به‌ ده‌ست گه‌وره‌كانیان
ده‌ست خه‌رۆبن
ئه‌گه‌ر ئه‌م جاره‌ هاتیه‌وه‌
له‌ بیر نه‌كه‌ی
مۆمێك یان قه‌ندیلۆكه‌یه‌ك
له‌گه‌ڵ خۆت بهێنیه‌وه‌
ده‌نا له‌ وڵاته‌ تاریكستانه‌كه‌مان
هیچ شتێ شك نابینی
به‌ر پێی خۆتی پێ ڕۆناك بكه‌یته‌وه‌
ئه‌گه‌ر ئه‌م جار هاتیه‌وه
بڕۆ سه‌رێك له‌ گۆڕه‌كه‌ی حاجی قادر بده‌‌
بزانه‌ له‌ ده‌ست ئه‌م حه‌سره
چه‌ند بێزاره‌ و ‌ دڵی
 سه‌غڵه‌ت بووه‌ .
له‌ داخی سه‌رانی كورد
گه‌ر جارێكی تر زیندوو بیته‌وه
هه‌رگیز قه‌ڵه‌م له‌ ده‌ست ناگری
شیعر بۆ كورد بنووسته‌وه‌ .‌

Comments (0)

Name

Email

Title

Comment

smaller | bigger

Add Comment